Sorgenbox
Historische Persönlichkeiten äussern sich zu Studiums-Sorgen. Dieses Mal: Hans Jucker.
Lieber Hans,
Ich sitze nur in Vorlesungen und bewege mich kaum mehr. Ich würde gerne mehr Sport machen und auch gleich etwas Neues ausprobieren. Vielleicht kannst du mir etwas empfehlen?
Pascal Hinterseer
Sali Päsche!
Wo söll ich da aafange? Ich han alles kommentiert, sogar Gwichthebermeischterschafte! Und eigentlich hani debii überhaupt keis System gha. Aber jetzt verzell ich zersch no en Witz: Da chunt eine inä Bar und bschtellt zwei Whisky. Dä Barkeeper frögt: «Wieso zwei?» Er seit: «Ja, min Fründ isch uf Australie usgwanderet. Jetzt trinkemer jede Tag zäme en Whisky!» Vier Wuche lang isch das guet gange, plötzlich chunt er und seit: «Ein Whisky!» Frögt dä Barkeeper: «Isch ihrem Fründ in Australie öppis passiert?» Seit dä ander: «Nei, gar nöd, aber ich trinke sit hüt kei Alkohol meh!» Hähähähähä! Mer chan sichs ja luschtig mache, oder?
Ou, das isch jetzt bezüglich dinere Frag en Fehlstart gsi, und so öppis regt mi uf! Das isch wie bi däne tumme huere Ruederer! Det hani immer gschnurret und gschnurret und dänn sinds mer eifach devoo gfahre. Go ruedere söttsch also nöd, Päsche. Und wänn nöd gärn Wasser häsch, söttsch au nöd go Velo fahre. Das glaubsch nöd, det schiffts uneufe! Ich säg der, du, Gopfertamisiech, det wirsch tropfnass! Wänn gärn Tier häsch, chöntsch go riite. Aber wänn das machsch, dänn bitte eifach nöd uf däne Schiissponys! Oder gahsch in Skizirkus. Det bin ich am Abig meischtens no irgendwo in ä Bar ine, eimal isch dänn s’Vreni Schneider au no cho und hät irgenden Kamilletee präpariert. Ich han dänn en andere «Tee» gna! Chähähähähäh! Han scho immer en guete Schluck gha!
Das tönt jetzt luschtig, aber, Päsche, glaubmer, ich han bim SF viel Erfahrig gsammlet und weiss, vo was ich rede. Jede Sport chan spannend sii! Ich hoffe, du glaubschmer, wel mängisch han ich s Gfühl, ich han dä Lüüt zwar öppis bedüütet, aber nur wäge sötigem, woni gschiiider nöd gseit hett. Das Internetvideo händ scho fascht ä Million Lüüt aagluegt, und es isch unglaublich, wie die junge Lüüt jetzt wäg däm uf mich zuechömed. Debii han ich viel weniger Chabis gschnurret als dä Beni, dä huere Löli!
Hans Jucker, *11.01.1946, †19.02.2011, war Sportreporter beim Schweizer Fernsehen. Er hat über 10’000 Stunden Sport live kommentiert.